Mediumi prestigjioz amerikan CNN ka renditur këngën “Zjerm” të grupit Shkodra Elektronike si këngën më të mirë të Eurovision Song Contest 2025, duke i dhënë Shqipërisë një vlerësim historik në skenën ndërkombëtare të muzikës.
Në një artikull të publikuar të premten, ku analizohen dhe renditen 26 këngët finaliste të këtij edicioni, Shqipëria zë vendin e parë. Autori Rob Picheta e përshkruan dyshen shqiptare si “më të papriturit e këtij viti”, ndërsa veçon se stili i tyre “e tejkalon kufirin e zakonshëm të Eurovisionit”.
Në një prononcim për CNN, Beatriçe Gjergji, vokalistja e grupit, theksoi se pjesëmarrja e tyre ishte një hap jashtë zonës së rehatisë:
“Eurovisioni në fakt nuk është një tip i muzikës sonë.”
Pikërisht ky dallim është ajo që, sipas CNN, e bëri “Zjerm” të dallohet mes garuesve, duke e shndërruar në një sukses të papritur e të merituar.
“Nëse beson në llojin e muzikës që do, ndoshta mund të ndodhë diçka,” – shtoi Beatriçe, duke reflektuar mbi triumfin dhe ndikimin që sjell autenticiteti.
Ky vlerësim i CNN përbën një moment historik për muzikën shqiptare, duke e ngritur emrin e Shqipërisë lart në hartën e muzikës evropiane.
