Këngëtarja e njohur shqiptare Elhaida Dani ka folur për herë të parë hapur rreth përvojës së saj në spektaklin “Dancing With The Stars”, duke zbuluar se periudha pas pjesëmarrjes në emision ishte një ndër më të vështirat e jetës së saj.
E ftuar në “The Dalina Show”, artistja ka treguar se lidhja e saj me kërcimtarin profesionist Ledian Agalliu, e lindur gjatë kohës së garës, solli një reagim të ashpër nga ndjekësit në rrjetet sociale.
“Më vinin mesazhe të tmerrshme! Madje edhe mesazhe vrasjeje. Nuk ishte aspak e drejtë. Po të mos isha lidhur në Dancing with the Stars, do ta kisha fituar,” – rrëfeu Elhaida me emocione.
Këngëtarja u shpreh se kjo periudhë e mbushur me kritika dhe urrejtje online e ka prekur thellë, por në të njëjtën kohë e ka forcuar shpirtërisht dhe e ka bërë të kuptojë fuqinë që mund të kenë komentet në rrjete sociale.
“Ishte e dhimbshme, por më bëri më të fortë. Mësova të mos lejoj askënd të më thyejë me fjalë,” – shtoi ajo.
Megjithatë, Elhaida theksoi se nuk e pendon aspak pjesëmarrjen në spektakël, të cilin e konsideron si një përvojë transformuese artistike, që i dha mundësinë të tregonte një anë të re të vetes dhe të ndante me publikun pasionin për skenën.
Aktualisht, këngëtarja po punon në projekte të reja muzikore, ndërsa ka paralajmëruar se shumë shpejt do të vijë me këngë të reja dhe emocione të reja për fansat e saj.
