Deklarata e G Bani-t sjell anulimin e koncertit në Drenas
Një deklaratë e bujshme nga këngëtari i njohur G Bani në një video të publikuar në TikTok ka sjellë pasoja të menjëhershme, duke çuar në anulimin e koncertit të tij të planifikuar në kuadër të festivalit “Muaji i Mërgatës” në Drenas.
Artisti, i revoltuar nga komentet fyese që kishte marrë online, është shprehur ndër të tjera:
“Po të dija që janë kaq racistë ndaj meje, nuk do të më ndjente as në ‘99-ën.”
Kjo fjali është konsideruar e papranueshme nga organizatorët e festivalit, të cilët reaguan me një deklaratë zyrtare, duke njoftuar anulimin e koncertit të planifikuar për mbrëmjen e nesërme. Ata theksuan se gjuha e përdorur nga G Bani bie ndesh me vlerat që përfaqëson festivali.
“Si organizatorë të këtij festivali e konsiderojmë të papranueshme gjuhën fyese dhe mungesën e etikës në komunikim. Ky festival ka ndërtuar reputacion dhe nuk mund të jetë platformë për artistë që shfaqin qëndrime denigruese ndaj qytetarëve tanë,” – thuhej në reagimin zyrtar.
Organizatorët rikujtuan se “Muaji i Mërgatës” është një ngjarje që synon bashkimin e shqiptarëve të mërgatës me ata në vendlindje, përmes kulturës, respektit dhe dinjitetit. Çdo qasje që cënon këto vlera, sipas tyre, është e papranueshme.
Pas vendimit, G Bani reagoi sërish përmes një videoje, ku sqaroi se komentet e tij ishin drejtuar ndaj një grupi ndjekësish specifikë që e kishin fyer personalisht, dhe jo ndaj qytetarëve të Kosovës në përgjithësi.
Megjithatë, organizatorët u shprehën se komentet kishin kaluar kufirin e tolerueshëm, dhe vendimi për anulimin e performancës mbetet i pakthyeshëm.
Ky rast shihet si një precedent i rëndësishëm për festivalet publike në vend, duke vendosur standarde të qarta mbi etikën dhe përgjegjësinë publike të artistëve.
