Faqja zyrtare e “Për’puthen” ka publikuar videon e momentit që çoi në largimin e Laert Vasilit nga programi. Në pamje shihet opinionisti teksa puth papritur në buzë një nga konkurrentet gjatë regjistrimit në studio. Sipas burimeve, veprimi nuk ishte pjesë e ndonjë skenari apo marrëveshjeje mes tyre, duke krijuar menjëherë një situatë të sikletshme për konkurrenten dhe stafin.
Produksioni ka ndërhyrë menjëherë, duke e konsideruar gjestin si shkelje të etikës dhe rregullave të formatit. Si pasojë, është marrë vendimi për largimin e menjëhershëm të Vasilit nga paneli i opinionistëve – një vendim që, sipas burimeve, është përfundimtar.
Pas publikimit të lajmit, rrjetet sociale shpërthyen në reagime, ndërsa emri i tij u kthye në një nga temat më të diskutuara. Në mes të aludimeve për përjashtimin, Laert Vasili reagoi në mënyrë të tërthortë përmes një “story” në Instagram. Ai publikoi një foto nga një episod i regjistruar më herët, ku shfaqej i ulur në kolltukun e opinionistit, i shoqëruar me kolonën zanore të filmit “The Godfather” – një zgjedhje që u interpretua nga ndjekësit si mesazh simbolik për “pushtetin” dhe qëndrimin e tij përballë situatës.
Megjithatë, i kontaktuar nga media, ai ka preferuar të mos komentojë drejtpërdrejt mbi ngjarjen, duke u mjaftuar me një përgjigje të shkurtër. Ndërkohë, produksioni nuk ka dhënë ende detaje shtesë mbi mënyrën se si do të trajtohet incidenti në episodet e ardhshme.
Ngjarja vazhdon të mbetet në qendër të vëmendjes, ndërsa publikimi i pamjeve ka ndezur edhe më shumë debatin mbi kufijtë e etikës në ekran.
