Pas shumë vitesh në ekran dhe një karriere të suksesshme si moderatore, Luana Vjollca po hyn në një kapitull të ri profesional. Sezoni i ri televiziv e ka gjetur jashtë ekranit, por jo jashtë vëmendjes. Ndërsa fansat prisnin rikthimin e saj me një format të ri, Luana ka zgjedhur të sfidojë veten në një tjetër fushë: aktrimin.
Burime konfirmojnë se ajo ka nisur xhirimet për një film të ri komedi-aksion, ku do të luajë rolin kryesor përballë aktorit të njohur Nik Xhelilaj. Projekti po mbahet diskret, me synimin që debutimi i Luanës në aktrim të vijë si surprizë për publikun.
Ndërkohë, pavarësisht spekulimeve për rikthimin në muzikë apo drejtimin e një programi televiziv, Luana këtë sezon ka zgjedhur të fokusohet edhe në sipërmarrje, duke zhvilluar bizneset e saj.
Megjithatë, ajo nuk e ka lënë pas dore televizionin. Luana ka dorëzuar një platformë zyrtare për prezantimin e Festivalit të Këngës në RTSH. Platforma është aktualisht në shqyrtim, ndërsa në garë për drejtimin e festivalit është edhe moderatorja Arbana Osmani.
Nga ana tjetër, autorja Zefina Hasani ka refuzuar të rikthehet si autore e festivalit, dhe sipas burimeve pranë RTSH, tashmë po diskutohet emri i gazetarit dhe moderatorit Ervin Kurti për këtë rol.
E ndërsa mbetet e paqartë nëse Luana do të rikthehet në ekran si moderatore, ajo po përgatitet të shfaqet për herë të parë si aktore në kinematografi – një hap i guximshëm që mund t’i hapë një rrugë krejt të re në karrierën e saj.
