Reperi i njohur shqiptar, Feronit Shabani – i njohur për publikun si Fero – ka ndarë një moment të ndjerë në rrjetet sociale, duke treguar dhimbjen e thellë që po përjeton për mungesën e vajzës së tij, Ninës.
Në një postim të shkurtër, por të ngarkuar emocionalisht në InstaStory, ai shkroi:
“Gati një vit pa të parë. Ndoshta ke harruar se kush është babai yt, ose ndoshta po të mungoj. Mendoj shumë për ty, na kanë bërë padrejtësi.”
Postimi u shoqërua edhe me hashtagun #shtetikorruptuar, një shenjë e revoltës së tij ndaj sistemit të drejtësisë.
Prej kohësh, Fero ka akuzuar ish-bashkëshorten e tij, modelen Arbenita Ismajli, për shkelje të marrëveshjes së kujdestarisë së vajzës. Ai ka theksuar në intervista se ka kaluar muaj të tërë pa mundur ta takojë Ninën.
Ndërkohë që është rikthyer në muzikë, jeta e reperit vazhdon të jetë e trazuar. Ai po përballet edhe me një proces gjyqësor, ku ndaj tij janë ngritur tri aktakuza – ndër to, sipas burimeve mediale, përfshihen ngacmim seksual dhe dhunë psikologjike ndaj Arbenitës. Megjithatë, këto akuza nuk janë ende të konfirmuara zyrtarisht nga gjykata.
Dhimbja e një babai për vajzën e tij mbetet në qendër të kësaj historie që ka tërhequr vëmendjen e publikut, ndërkohë që çështja ligjore vazhdon të mbetet pezull.
