Aktorja e njohur Zendaya i është përgjigjur publikisht spekulimeve për një martesë të fshehtë me Tom Holland gjatë një interviste në “Jimmy Kimmel Live!”. Ajo hodhi poshtë lajmet që qarkullonin në rrjet, duke theksuar se fotot që po shpërndaheshin nuk ishin reale, por të krijuara me inteligjencë artificiale.
Zhurma nisi pasi stilisti i saj, Law Roach, përmendi në Actor Awards 2026 se dyshja kishte një marrëdhënie martesore, çka nxiti reagime të shumta nga fansat. Situata u përshkallëzua edhe më tej kur në internet u publikuan imazhe të supozuara nga ceremonia e tyre e martesës, të cilat shumë njerëz i besuan si autentike.
Gjatë intervistës, Zendaya sqaroi me humor se kishte parë reagimet e publikut dhe kishte mbetur e habitur nga besimi që u ishte dhënë fotove. Ajo madje solli një video nga projekti i saj i ri filmik “The Drama”, ku shfaqet si nuse përkrah Robert Pattinson. Në pamje, fytyra e Tom Holland ishte vendosur në mënyrë qesharake mbi trupin e Pattinson, duke krijuar konfuzionin që nxiti gjithë thashethemet.
Paraqitja e saj në emision erdhi vetëm një ditë pasi u shfaq në Oscars 2026 me një unazë që u interpretua si simbol fejesë apo martese, duke shtuar më shumë dyshimet. Megjithatë, aktorja e bëri të qartë se nuk ka asnjë martesë të vërtetë.
Ndërkohë, filmi i ri “The Drama”, ku Zendaya dhe Robert Pattinson ndajnë ekranin, pritet të dalë në kinema më 3 prill, duke rritur edhe më shumë interesin e publikut për projektin e saj të radhës.
